Հարց ու պատասխան Էփրիքոթի հետ | Որո՞նք են կիբերանվտանգության հիմնական կանոնները ներդրումներ կատարելիս

Հոկտեմբերը համարվում է կիբերանվտանգության մասին իրազեկվածության բարձրացմանը նվիրված ամիս, և լինելով տեղեկատվական անվտանգության ոլորտի ամենահեղինակավոր ստանդարտներից մեկի՝ ISO/IEC 27001:2022-ի հավաստագիր ունեցող ընկերություն, մենք միանում ենք այդ նախաձեռնությանը։ «Հարց ու պատասխան Էփրիքոթի հետ» շարքի այս գրառումը նվիրված է հենց կիբերանվտանգությանը։ Մենք կանդրադառնանք կիբերանվտանգության կանոններին, որոնց անհրաժեշտ է հետևել ներդրումներ կատարելիս։

Ֆինանսական շուկաներում Ձեր ակտիվների անվտանգությունն ապահովելը սկսվում է Ձեր զգոն լինելուց։

• Հաշվի անվտանգություն

Ձեր հաշվի անվտանգությունը սկսվում է ճիշտ բրոքեր ընտրելուց։ Համոզվեք, որ Ձեր բրոքերը լիցենզավորված է ՀՀ Կենտրոնական բանկի կողմից։ Այլ հիմնական կանոններից են.

• Մի՛ օգտագործեք հեշտ կռահվող գաղտնաբառեր (օրինակ՝ Ձեր ծննդյան ամսաթիվը)։ Մի՛ օգտագործեք նույն գաղտնաբառը մի քանի հաշիվների համար։ Օգտագործեք երկար և բարդ գաղտնաբառ և երբեք մի՛ տրամադրեք այն ուրիշներին։
• Հնարավորության դեպքում, օգտագործեք երկփուլային նույնականացում (2FA)։

• Սարքի և ցանցի պաշտպանություն

Կարևոր է համոզվել, որ այն սարքը, որն օգտագործում ենք մեր բրոքերային հաշիվներ մուտք գործելու համար (բջջային հեռախոս, պլանշետ և այլն), ապահով է։ Կարևոր է ձեռնարկել հետևյալ քայլերը.

• Ծրագրային ապահովման թարմացում: Թարմացրեք Ձեր բրոքերի հավելվածը և Ձեր սարքի ծրագրային ապահովումը։ Այդ թարմացումները պարունակում են նաև անվտանգության հետ կապված կարևոր թարմացումներ։
• Խուսափեք հանրային Wi-Fi-ից: Ցանկալի չէ մուտք գործել ձեր հաշիվ կամ գործարքներ կատարել՝ օգտագործելով հանրային (օրինակ՝ սրճարանների կամ օդանավակայանների) անվճար Wi-Fi ցանցերը։ Դրանք հաճախ խոցելի են։

• Ֆիշինգ և խարդախություններ

• Եղեք զգոն էլեկտրոնային նամակների նկատմամբ՝ ֆիշինգից խուսափելու համար: Եղեք զգոն այն էլեկտրոնային նամակների կամ հաղորդագրությունների նկատմամբ, որոնք խնդրում են տրամադրել Ձեր մուտքի տվյալները կամ դրդում են կատարել շտապ գործողություններ։ Ստուգեք ուղարկողի հասցեն կամ հեռախոսահամարը՝ համոզվելու համար, որ այն եկել է պաշտոնական էլեկտրոնային փոստից կամ համարից։ Կասկածի դեպքում՝ կապ հաստատեք ընկերության հետ վերջինիս պաշտոնական կայքում նշված կոնտակտային տվյալներով։ Մի սեղմեք կասկածելի հղումների վրա։
• Զգուշացեք չափազանց լավ առաջարկներից։ Զգուշացեք համացանցում անհայտ աղբյուրներից ստացված ներդրումային «երաշխավորված» առաջարկներից։ Եթե տեսնում եք բարձր տոկոսների խոստում, որոնք «երաշխավորված» կամ «ապահով» են, ստուգեք այդ առաջարկի իսկությունը կամ խոստացվածի խելամիտ լինելը։ Համոզվեք, որ ներդրումներ եք կատարում ՀՀ ԿԲ կողմից լիցենզավորված ընկերության միջոցով։ Այդ ընկերությունների ցանկը հասանելի է ԿԲ կայքում։

Էփրիքոթ Կապիտալը վերահսկվում է ՀՀ Կենտրոնական բանկի կողմից։

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: Տեքստում նշված նախկինում գրանցված կատարողականը չի երաշխավորումապագայում նմանատիպ արդյունքներ: