Հարց ու պատասխան Էփրիքոթի հետ | Ինչպե՞ս են պասիվ ներդրողները կիրառում շուկայական ինդեքսները

Վերջին տարիներին պասիվ ներդրումները գնալով ավելի տարածում են գտնում։ Շատ ներդրողներ նախընտրում են հետևել շուկայի ընդհանուր շարժին՝ առանց իրենց ծանրաբեռնելու առանձին բաժնետոմսեր ընտրելու աշխատանքով։ Այս մոտեցման մեջ կարևոր դեր են խաղում շուկայական ինդեքսները։ Այս գրառման մեջ կքննարկենք, թե ինչ են ինդեքսները և ինչպես են դրանք կիրառվում պասիվ ներդրողների կողմից։

Ի՞նչ է շուկայական ինդեքսը

Ինդեքսը շուկայի որոշակի հատվածի կամ ոլորտի կատարողականի չափումն է։ Պատկերացրեք, որ ընտրվել է բաժնետոմսերի խումբ, որոնց արդյունքները միասին ցույց են տալիս տվյալ շուկայի ընդհանուր առողջությունն ու շարժի ուղղությունը։

Ամենատարածված ինդեքսներից են․

• S&P 500 | Հետևում է ԱՄՆ 500 խոշոր ընկերությունների կատարողականին, որոնք կազմում են ԱՄՆ ֆոնդային շուկայի ընդհանուր կապիտալիզացիայի մոտ 80%-ը։
• Nasdaq 100 | Բաղկացած է Nasdaq ֆոնդային բորսայում գրանցված 100 խոշորագույն ոչ ֆինանսական, հիմնականում տեխնոլոգիական ընկերություններից։
• Dow Jones Industrial Average (DJIA) | Հետևում է ԱՄՆ-ի 30 խոշոր, կայացած ընկերությունների կատարողականին։
• FTSE 100 | Հետևում է Լոնդոնի ֆոնդային բորսայում ցուցակված 100 խոշորագույն ընկերություններին։
• Euro Stoxx 50 | Ներկայացնում է եվրագոտու 50 առաջատար ընկերությունների կատարողականը։
• DAX 40 | Ներկայացնում է Գերմանիայի 40 խոշորագույն ընկերությունների կատարողականը, որոնք ցուցակված են Ֆրանկֆուրտի բորսայում։
• CAC 40 | Հետևում է Փարիզի ֆոնդային բորսայում ցուցակված 40 խոշորագույն ընկերությունների կատարողականին։

Այս ինդեքսները ներդրողներին օգնում են հետևել ամբողջ շուկայի կամ նրա որևէ հատվածի արդյունքին։

Ինչո՞ւ և ինչպե՞ս են պասիվ ներդրողները օգտագործում ինդեքսները

Պասիվ ներդրողները չեն ցանկանում անդադար հետևել նորություններին ու հաշվետվություններին կամ ընտրել առանձին բաժնետոմսեր։ Նրանք ցանկանում են ստանալ պասիվ եկամուտ՝ կրկնօրինակելով շուկայի ընդհանուր եկամտաբերությունը։

Նման պասիվ ներդրումների ամենատարածված միջոցը ինդեքսներին հետևող ETF-ների մեջ ներդրումներ կատարելն է։ Այս ֆոնդերը կառավարվում են մասնագետների կողմից, ովքեր ձևավորում են այնպիսի պորտֆել, որը գրեթե ամբողջությամբ կրկնօրինակում է տվյալ ինդեքսի կառուցվածքն ու շարժը։ Այդպիսով պասիվ ներդրողը ստանում է շուկայի միջին եկամտաբերությունը՝ չծախսելով շատ ժամանակ կամ ջանք։

Առավելությունները

• Պարզություն | Ներդրողը չի փորձում կանխատեսել առանձին ընկերությունների կատարողականը։ Փոխարենը նա ներդրում է անում ամբողջ ինդեքսում։
• Ցածր ծախսեր | Ինդեքսներին հետևող ETF-ների գնի մեջ ներառված է դրա կառավարման վճարը, որը սովորաբար ցածր է` 0.02%-ից 1%։
• Դիվերսիֆիկացում | Շուկայական ինդեքսները ներառում են տասնյակ կամ հարյուրավոր ընկերություններ տարբեր ոլորտներից։ Սա նվազեցնում է ռիսկը․ եթե մեկ ընկերության բաժնետոմսի գինը նվազի, մյուս ընկերությունների արդյունքը կարող է հավասարակշռել կորուստը։

Օրինակ՝ ներդրողը ցանկանում է հետևել ամերիկյան շուկայի ընդհանուր շարժին։ 500 տարբեր ընկերությունների բաժնետոմս գնելու փոխարեն, նա պարզապես գնում է S&P 500-ին հետևող ETF (օրինակ՝ SPY*, VOO*, IVV* և այլն)։ Այս ETF-ների արժեքը շարժվում է նույն ուղղությամբ, ինչ ինդեքսը։

Այս տարբերակը ներդրողին հնարավորություն է տալիս փոքր ծախսերով ներդրում կատարել ամբողջ ամերիկյան շուկայում։

ETF-ների մասին ավելին իմանալու համար կարող եք դիտել մեր փոդքասթի ETF-ներին նվիրված էպիզոդը։

Հետաքրքրվա՞ծ եք ներդրումներով

Բացեք անվճար բրոքերային հաշիվ և ներբեռնեք մեր Apricot հավելվածը App Store-ից և Google Play-ից։ Իմացեք ավելին ներդրումների մասին Էփրիքոթ Ակադեմիայում։ 

Կարևոր է հիշել, որ ցանկացած ներդրում ենթակա է շուկայական տատանումների և կրում է ներհատուկ ռիսկեր: Նախքան ներդրումներ կատարելը, հաշվի առեք Ձեր ֆինանսական նպատակները և ֆինանսական ռիսկեր ստանձնելու Ձեր ունակությունը:

Էփրիքոթ Կապիտալը վերահսկվում է ՀՀ Կենտրոնական բանկի կողմից։ 

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: Տեքստում նշված նախկինում գրանցված կատարողականը չի երաշխավորում ապագայում նմանատիպ արդյունքներ: