Մաս 10. Ռիսկի ախորժակ

Շարունակում ենք «Էփրիքոթի հետ ներդրողի բառարան» շարքում փորձառու և սկսնակ ներդրողների համար կարճ և հասանելի ձևով ներկայացնել ոլորտի տերմինները: Այս հոդվածում կխոսենք ներդրողների համար շատ կարևոր մի հասկացության՝ ռիսկի ախորժակի մասին: Ճիշտ այնպես, ինչպես որոշ մարդիկ նախընտրում են կծու սնունդ, իսկ մյուսներն՝ առանց համեմունք, ներդրողները նույնպես ունեն ռիսկի նկատմամբ տարբեր ախորժակ։ Ձեր ռիսկի ախորժակը հասկանալը կարևոր է, որպեսզի Ձեր ներդրումները համապատասխանեն և համահունչ լինեն Ձեր ֆինանսական նպատակների հետ:

Ռիսկի ախորժակը

Ռիսկի ախորժակը Ձեր պատրաստակամությունն ու կարողությունն է ստանձնել ֆինանսական ռիսկեր՝ հնարավոր օգուտ ստանալու ակնկալիքով։ Այն անհատական ​​է և դրա վրա ազդում են մի քանի գործոններ, ինչպես օրինակ՝

• Տարիքը | Երիտասարդ ներդրողները սովորաբար ավելի երկար ժամանակային հորիզոն ունեն և հաճախ կարող են իրենց թույլ տալ ավելի մեծ ռիսկ ստանձնել:
• Ֆինանսական նպատակները | Եթե ​​ներդրողն ունի ագրեսիվ նպատակներ և ձգտում է բարձր եկամուտների, նա կարող է ավելի շատ ռիսկի դիմել դրանց հասնելու համար:
• Եկամուտն ու խնայողությունները | Կայուն եկամուտը և զգալի խնայողությունները կարող են անվտանգության բարձիկ լինել բարձր ռիսկային ներդրումներ կատարելիս:
• Ներդրումների ոլոտում փորձը | Ներդրումների հետ կապված Ձեր անցյալ փորձը, լինի դա դրական, թե բացասական, կարող է զգալիորեն ձևավորել Ձեր ռիսկի ախորժակը:

Ինչո՞ւ է ռիսկի ախորժակը կարևոր

• Ներդրումների ընտրություն | Ձեր ներդրումային ընտրությունները պայմանավորված կլինեն Ձեր ռիսկի ախորժակով: Եթե ​​դուք պահպանողական մոտեցում ունեք, կարող եք նախընտրել ավելի ապահով տարբերակներ, ինչպիսիք են օրինակ պետական պարտատոմսերը: Իսկ եթե պատրաստ եք ստանձնել ռիսկ, կարող եք դիտարկել աճի ներուժ ունեցող բաժնետոմսեր:
• Ներդրումային պորտֆելի ձևավորում | Ձեր ռիսկի ախորժակը որոշում է, թե ինչպես եք ակտիվները բաշխում Ձեր պորտֆելում: Հավասարակշռված պորտֆելը սովորաբար ներառում է ցածր ռիսկային և բարձր ռիսկային ներդրումների խառնուրդ՝ հարմարեցված Ձեր անհատական ռիսկի ախորժակի մակարդակին:
• Հուզական բարեկեցություն | Ձեր ռիսկի հանդուրժողականությանը չհամապատասխանող ակտիվներում ներդրումներ կատարելը կարող է հանգեցնել սթրեսի և անհանգստության, հատկապես շուկայի անկումների ժամանակ: Ձեր ռիսկի ախորժակը հասկանալն օգնում է Ձեզ այնպիսի որոշումներ կայացնել, որոնց հետ կարող եք ապրել՝ անկախ շուկայական պայմաններից:

Կհանդիպենք 11-րդ մասում, որտեղ կշարունակենք բացահայտել ներդրումների աշխարհը:

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: