Մաս 11. Մարժային առևտուր

Շարունակում ենք «Էփրիքոթի հետ ներդրողի բառարան» շարքը: Մենք արդեն ուսումնասիրել ենք ներդրումային աշխարհի հիմնական բառերն ու հասկացությունները: Այսօր կծանոթանանք մի փոքր ավելի բարդ հասկացության մարժային առևտրի հետ:

Մարժային առևտուր | Փոխառություն՝ Ձեր այգին մեծացնելու համար

Պատկերացրեք, որ դուք տեսնում եք Ձեր այգին ընդլայնելու հնարավորություն՝ հավատալով, որ որոշ «սերմեր» (բաժնետոմսեր, ETF կամ այլ ներդրումային գործիքներ) ունեն Ձեր ցանկալի պտուղը (եկամուտը) տալու ներուժը: Դուք կարող եք համբերությամբ խնայել և գնել ավելի շատ «սերմեր», երբ ունենաք միջոցներ, կամ կարող եք պարտք վերցնել՝ գործընթացն արագացնելու համար: Մարժային առևտուրը նման է փոխառություն վերցնելուն. դուք գումար եք վերցնում Ձեր ներդրումային այգու համար ավելի շատ «սերմեր» գնելու նպատակով:

Ինչպե՞ս է այն աշխատում

Մարժային առևտուրը թույլ է տալիս օգտագործել Ձեր բրոքերի գումարը (այս դեպքում՝ Apricot Capital-ի) լրացուցիչ արժեթղթերում ներդրումներ կատարելու համար: Այս «փոխառված» գումարը կոչվում է «մարժա»:

Apricot Capital-ում մարժային առևտուրը հասանելի է որոշակի ներդրումային գործիքների համար: Այն գումարը, որից կարող եք օգտվել, կախված է Ձեր բրոքերային հաշվում առկա ակտիվների արժեքից: Այս ակտիվները հանդես են գալիս որպես գրավ («երաշխիք») օգտագործված գումարի համար:

Մեր համակարգը շարունակաբար դիտարկում է Ձեր պորտֆելի կատարողականը: Եթե Ձեր ակտիվների արժեքը որոշակի մակարդակից ցածր դառնա, համակարգը ավտոմատ կերպով կփակի Ձեր դիրքը (կվաճառի Ձեր ակտիվների մի մասը) փոխառված գումարը մարելու համար: Սա պաշտպանում է և՛ Ձեզ, և՛ Apricot Capital-ին կորուստներից:

Դրական և բացասական կողմերը

• Դրական կողմ | Մարժային առևտուրը մեծացնում է Ձեր եկամուտները, եթե Ձեր ներդրումներն ունենան լավ կատարողական: Այն նաև ներդրողին տալիս է ավելի ճկուն և գնողունակ լինելու հնարավորություն:
• Բացասական կողմ | Մարժային առևտուրը մեծացնում է Ձեր կորուստները, եթե ձեր ներդրումները նվազում են: Այն բարձր ռիսկային ռազմավարություն է, որ հարկավոր է լավ հասկանալ և ընկալել։ Հարկավոր կլինի բրոքերին տոկոսներ վճարել «փոխառված» միջոցների դիմաց:

Խելացի կերպով մեծացրեք Ձեր այգին

Այս տարբերակը հասանելի է համապատասխան ներդրողներին և վերապահված է փորձառու ներդրողների համար: Եթե ​​դուք դիտարկում եք մարժային առևտուրը, ապա կարևոր է՝

• Հասկանալ ռիսկերը՝ լիովին տեղեկանալով հնարավոր բացասական կողմերի և հնարավոր կորուստների մասին:
• Սկսել փոքրից։ Եթե առաջին անգամ եք օգտվում մարժային առևտրի հնարավորությունից, սկսեք փոքր գումարից և աստիճանաբար ավելացրեք այն, երբ ավելի փորձառու դառնաք:
• Ունենալ գործողությունների ծրագիր։ Նախքան սկսելը սահմանեք հստակ նպատակներ և ռիսկերի սահմաններ։ Իմացեք, թե երբ պետք է կրճատել ձեր կորուստները և դուրս գալ:
• Մշտապես հետևել Ձեր պորտֆելին և շուկային: Պատրաստ եղեք գործել, եթե Ձեր ներդրումները նվազեն:

Արդյո՞ք մարժային առևտուրը հարմար է Ձեզ համար

Մարժային առևտուրը բոլորի համար չէ: Այն հարմար է փորձառու ներդրողների համար, ովքեր ունեն ռիսկի բարձր հանդուրժողականություն: Եթե ​​դուք սկսնակ եք կամ խուսափում եք ռիսկից, խելամիտ է ընտրել Ձեր սեփական կապիտալով ներդրումներ կատարելու տարբերակը, քանի դեռ ավելի շատ փորձ ձեռք չեք բերել:

Կարևոր է հիշել, որ ցանկացած ներդրում ենթակա է շուկայական տատանումների և կրում է ներհատուկ ռիսկեր: Նախքան ներդրումներ կատարելը, հաշվի առեք Ձեր ֆինանսական նպատակները և ֆինանսական ռիսկեր ստանձնելու Ձեր ունակությունը:

Էփրիքոթ Կապիտալը վերահսկվում է ՀՀ Կենտրոնական բանկի կողմից։

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: Տեքստում նշված նախկինում գրանցված կատարողականը չի երաշխավորում ապագայում նմանատիպ արդյունքներ: