Մաս 5. Ներդրումային պորտֆել

Շարունակում ենք «Էփրիքոթի հետ ներդրողի բառարան» շարքում փորձառու և սկսնակ ներդրողների համար կարճ և հասանելի ձևով ներկայացնել ոլորտի տերմինները: Շարքը սկսում ենք բազային բառապաշարից և ժամանակի հետ սահուն անցում կկատարենք դեպի ավելի բարդ տերմինաբանության:

Մաս 1․ Ներդրումներ, Ռիսկեր, Դիվերսիֆիկացում-ում ներդրումները համեմատեցինք ծիրանի ծառ տնկելու հետ։ Մաս 2: Բաժնետոմսեր -ում, Մաս 3: Պարտատոմսեր-ում և Մաս 4. Exchange-Traded Funds (ETFs)  ուսումնասիրեցինք հիմնական «սերմերը» (ներդրումային գործիքների տեսակներ), որոնք կարող եք տնկել ձեր ֆինանսական այգում:

Այսօր կուսումնասիրենք ներդրումային պորտֆելը՝ ձեր բոլոր ներդրումների հավաքածուն:

Ձեր ներդրումային պորտֆելը՝ Ձեր ներդրումային այգին

Շարունակենք այգեգործության անալոգիան, որտեղ ներդրումներ կատարելը համեմատում ենք ծառ տնկելու հետ: Այս դեպքում ձեր ներդրումային պորտֆելը ձեր ամբողջ այգին է՝ իր բոլոր ծառերով ու տարբեր սերմերով (բաժնետոմսեր, պարտատոմսեր, ETF-ներ, և այլն):

Ինչ է պետք իմանալ ներդրումային պորտֆելի մասին

1. Դիվերսիֆիկացում. Դիվերսիֆիկացման կարևորության մասին խոսել ենք մեր շարքի նախորդ մասերում: Տարբեր տեսակի «սերմեր» (բաժնետոմսեր, պարտատոմսեր, ETF-ներ, և այլն) աճում են տարբեր տեմպերով և տարբեր կերպ են արձագանքում շուկայի «եղանակային տատանումներին»: Դիվերսիֆիկացված ներդրումային պորտֆել ունենալն օգնում է պաշտպանել ձեր այգին, երբ որոշ ծառեր լավ բերք չէին բերում, մյուսների բերքը բալանսավորում է բերքահավաքը:
2. Ձեր կարիքներին համապատասխան այգու ձևավորում. Ձեր պորտֆելը արտացոլում է ձեր՝ որպես ներդրողի ուրույն կարիքներն ու նպատակները: Ավելի երիտասարդ ներդրողները կարող են ունենալ բարձր ռիսկային, բայց աճի ավելի բարձր ներուժ ունեցող «սերմերով» լի այգի, ինչպես օրինակ՝ բաժնետոմսերը, քանի որ նրանց առջևում ավելի շատ բերքահավաքի սեզոններ են սպասվում (ներդրումային հորիզոն): Իսկ թոշակի տարիքին ավելի մոտ ներդրողը կարող է նախընտրել պարտատոմսերի նման ավելի կայուն, ֆիքսված եկամուտ ունեցող «սերմերով» այգի:
3. Պրոֆեսիոնալ այգեպաններ. Մի ամբողջ պարտեզ կառավարելը որոշ մարդկանց համար ճնշող է թվում, ուստի նրանք նախընտրում են «վարձել պրոֆեսիոնալ այգեպան»՝ ներդրումներ կատարելով Exchange-Traded Funds (ETFs)-ներում, որոնք իրենցից ներկայացնում են տարբեր սերմերից կազմված փաթեթներ: Այս փաթեթները կառավարվում են մասնագետների կողմից, ովքեր ունեն այգիների կառավարման գիտելիքներ և փորձ, և դրա համար նրանք գանձում են փոքր վճար:
4. Չկա տիպային ներդրումային պորտֆել. Չկա կատարյալ ներդրումային պորտֆել: Ձեզ համար ճիշտ պորտֆելի կառուցվածքը կախված է ձեր ֆինանսական նպատակներից, նրանից, թե որքան ժամանակ եք նախատեսում ներդրումներ կատարել և ֆինանսական ռիսկեր ստանձնելու Ձեր ունակությունից։
5. Շարունակական “խնամք”. Ճիշտ այնպես, ինչպես այգին, ձեր պորտֆելը նույնպես խնամքի կարիք ունի: Չէ՞ որ սերմերը տնկելուց հետո այգին առանց ուշադրության չեք թողնի։ Ձեր պորտֆելը ձևավորելուց հետո պետք է պարբերաբար հետևեք դրան՝ տեսնելու, թե ինչ վիճակում են ձեր սերմերը և ծառերը: Կա՞ն “մեռնող” ծառեր ու շատ բերք բերող ծառեր: Համապատասխանաբար պետք է ձեռնարկեք անհրաժեշտ գործողություններ՝ ձեր այգին առողջ և ձեր նպատակների հետ հավասարակշռված պահելու համար:

Կարևոր է հիշել, որ ցանկացած ներդրում ենթակա է շուկայական տատանումների և կրում է ներհատուկ ռիսկեր: Նախքան ներդրումներ կատարելը, հաշվի առեք Ձեր ֆինանսական նպատակները և ֆինանսական ռիսկեր ստանձնելու Ձեր ունակությունը:

Կհանդիպենք 6-րդ մասում, որտեղ կուսումնասիրենք ներդրումային այլ տերմիններ։ Եվ հիշեք, որ գիտելիքի մեջ ներդրում կատարելն ամենաարժեքավոր որոշումներից մեկն է, որ կարող եք կայացնել:

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: