Մաս 23. Պահառու

Երբևէ Ձեզ հարցրե՞լ եք, թե որտեղ են պահվում Ձեր արժեթղթերը։ Այս հարցի պատասխանն է` պահառուի մոտ։ Եկեք ավելի մանրամասն քննարկենք, թե ով է պահառուն և ինչ դեր է կատարում ներդրումային գործընթացում։

Ո՞վ է պահառուն

Պահառուն ֆինանսական կազմակերպություն է, որը պահում և պաշտպանում է Ձեր ակտիվները՝ բաժնետոմսերը, պարտատոմսերը, ETF-ները և այլ արժեթղթեր։ Պատկերացրեք, որ այն Ձեր ներդրումային ակտիվների բանկն է, որը ֆիզիկապես կամ էլեկտրոնային եղանակով պահում է արժեթղթերը՝ կանխելով դրանց կորուստը, գողությունը կամ վնասվելը։

Ֆինանսական աշխարհում պահառուների անհրաժեշտությունը բխեց մի հիմնարար խնդրից՝ ինչպե՞ս ապահով կառավարել մեծ քանակությամբ արժեթղթեր՝ առանց դրանց ֆիզիկական պահպանման ռիսկերի։ Նախկինում ներդրողները ստիպված էին պահել թղթային բաժնետոմսերի վկայականներ, որոնք կարող էին կորչել, գողացվել կամ վնասվել։ Այս համակարգն անարդյունավետ էր և չուներ ստանդարտացված մեթոդ՝ սեփականությունը վերահսկելու և գործարքների ժամանակ ակտիվները փոխանցելու համար։ Քանի որ ֆինանսական շուկաներն աճում էին, և օրական միլիոնավոր գործարքներ էին կատարվում, կենտրոնացված և ապահով լուծումը դարձավ շատ պահանջված։ Պահառուները լրացրեցին այս բացը՝ տրամադրելով ակտիվների պահպանման և կառավարման անվտանգ, հուսալի և արդյունավետ համակարգ՝ այդպիսով պաշտպանելով ներդրողներին և հեշտացնելով ժամանակակից ֆինանսական համակարգի աշխատանքը։

Պահառուները, որոնք հաճախ խոշոր և հեղինակավոր ընկերություններ կամ բանկեր են, ենթարկվում են խիստ կարգավորումների։

Պահառուի ծառայությունները

Բացի իր հիմնական գործառույթից, պահառուն կարող է մատուցել մի շարք այլ ծառայություններ.

• Գործարքների վերջնահաշվարկ և հաշվետվություն | Պահառուն իրականացնում է գործարքների վերջնահաշվարկի գործընթացը, ապահովում է դրանց համապատասխանությունը կարգավորումներին և տրամադրում է գործարքների գրանցման ծառայություններ ու ակտիվների կարգավիճակի մասին հաշվետվություններ։
• Վարչական և օժանդակ ծառայություններ | Պահառուները կարող են իրականացնել հաշվի ադմինիստրավորում, հավաքագրել և բաշխել շահաբաժիններ ու տոկոսներ, ինչպես նաև զբաղվել արտարժույթի կառավարմամբ։ Նրանք կարող են նաև տրամադրել հարկային աջակցություն և պատրաստել անհրաժեշտ հաշվետվություններ։

Պահառուի ծառայությունների վճարները կախված են տրամադրվող ծառայությունների շրջանակից և կարող են հիմնված լինել պահվող ակտիվների արժեքի վրա։

Պահառու vs. Բրոքեր

Չնայած և՛ պահառուն, և՛ բրոքերը կարևոր դեր են խաղում ֆինանսական շուկաներում, նրանց գործառույթները տարբեր են։

• Բրոքերները ֆինանսական միջնորդներ են, որոնք հեշտացնում են արժեթղթերի առքուվաճառքը շուկայում։ Նրանք գործում են որպես ներդրողների գործակալներ՝ կատարելով հայտերը և տրամադրելով մուտք դեպի տարբեր ֆինանսական շուկաներ։ Նրանց հիմնական դերն է Ձեր հայտերի կատարումը և շուկա ստեղծելը (market-making)։
• Պահառուների հիմնական գործառույթը Ձեր ակտիվները պահելն ու դրանց ֆիզիկականան կամ էլեկտրոնային անվտանգությունն ապահովելն է։

Ե՛վ պահառուները, և՛ բրոքերները ենթակա են կարգավորող մարմինների վերահսկողության, սակայն նրանց վերաբերող կոնկրետ կանոնակարգերը կարող են տարբեր լինել։

Բացի մեր բրոքերային ծառայություններից, Էփրիքոթ Կապիտալը մատուցում է նաև պահառության ծառայություններ՝ ապահովելով մեր հաճախորդների արժեթղթերի անվտանգությունը։

Կարևոր է հիշել, որ ցանկացած ներդրում ենթակա է շուկայական տատանումների և կրում է ներհատուկ ռիսկեր: Նախքան ներդրումներ կատարելը, հաշվի առեք Ձեր ֆինանսական նպատակները և ֆինանսական ռիսկեր ստանձնելու Ձեր ունակությունը:

Էփրիքոթ Կապիտալը վերահսկվում է ՀՀ Կենտրոնական բանկի կողմից։ 

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: Տեքստում նշված նախկինում գրանցված կատարողականը չի երաշխավորում ապագայում նմանատիպ արդյունքներ: