Հարց ու պատասխան Էփրիքոթի հետ | Որքա՞ն հաճախ է պետք վերանայել ներդրումային պորտֆելը

Այսօր կքննարկենք մի հարց, որը հուզում է սկսնակ ներդրողներին՝ որքա՞ն հաճախ է պետք  վերանայել ներդրումային պորտֆելը։

Պորտֆելի վերանայման ճիշտ հաճախականությունը կախված է Ձեր անձնական ռազմավարությունից։ Շուկայի ամենօրյա փոփոխություններին անընդհատ հետևելը հիմնականում նպատակահարմար չէ երկարաժամկետ ներդրողների համար և կարող է հանգեցնել զգացմունքային որոշումների, օրինակ՝ խուճապի մատնվելով վաճառել կամ գնել որևէ արժեթուղթ։

Երկարաժամկետ ներդրումային հորիզոն ունեցող պասիվ ներդրողներ

Եթե Դուք ներդրումներ եք կատարում թոշակի անցման, երեխայի կրթության համար գումար կուտակելու, կապիտալը պահպանելու կամ նման երկարաժամկետ նպատակով, ապա կարելի է պորտֆելը վերանայել օրինակ մի քանի ամիսը մեկ կամ կիսամյակը մեկ։ Այս դեպքում հիմնական նպատակը պորտֆելի վերաբալանսավորումն է։ Այս թեմային մանրամասն անդրադարձել ենք մեր նախորդ գրառումներից մեկում։

Միջնաժամկետ ներդրումային հորիզոն ունեցող ակտիվ ներդրողներ

Եթե Ձեր ներդրումային հորիզոնը մի քանի տարի է կամ դուք ակտիվորեն հետևում եք շուկային, կարող եք վերանայել եռամսյակը մեկ կամ ավելի հաճախ՝ արձագանքելու ընկերության եկամուտների մասին հաշվետվություններին կամ մակրոտնտեսական փոփոխություններին։

Ակտիվ ներդրողներ և թրեյդերներ

Ակտիվ ներդրողներն ու թրեյդերները հիմնականում ձգտում են շահույթ ստանալ գների կարճաժամկետ տատանումներից, ուստի նրանց համար նույնիսկ մեկ րոպեն կարող է կարևոր լինել։ Նրանք կարող են իրականացնել մշտադիտարկում և վերանայել պորտֆելն ամեն օր կամ օրվա ընթացքում մի քանի անգամ՝ կախված իրենց ռազմավարությունից։

Ինչի՞ն են հիմնականում ուշադրություն դարձնում

Երբ վերանայում ենք մեր պորտֆելը (անկախ հաճախականությունից), կարելի է ուշադրություն դարձնել.

• Ակտիվների բաշխման հարաբերակցությանը | Եթե այն շեղվել է մեր սկզբնական նպատակից, ապա ռիսկը նվազեցնելու համար հարկավոր կլինի կատարել վերաբալանսավորում։
• Դիվերսիֆիկացիա | Արդյո՞ք մենք դիվերսիֆիկացրել ենք մեր պորտֆելը՝ ակտիվները բաշխելով տարբեր տիպի արժեթղթերի, ոլորտների կամ աշխարհագրական շրջանների միջև։
• Նպատակների համապատասխանություն | Արդյո՞ք մեր ֆինանսական նպատակները կամ ներդրումային հորիզոնը փոխվել են։ Օրինակ՝ գումար էինք կուտակում, որ ունենանք կապիտալ՝ աշխատանքից դուրս գալու և ֆինանսական ազատություն ունենալու համար (“թոշակի վաղ անցում”), և որոշել ենք ավելի երկարացնել կամ կրճատել այդ ժամանակը։ Ըստ դրա կարող է փոխվել, թե ինչպիսի ռիսկայնությամբ գործիքների մեջ ենք ներդրումներ կատարում։

Պորտֆելը վերանայելիս խորհուրդ է տրվում կենտրոնանալ նպատակի վրա և չկատարել զգացմունքների կամ խուճապի վրա հիմնված որոշումներ։

Հետաքրքրվա՞ծ եք ներդրումներով

Բացեք անվճար բրոքերային հաշիվ և ներբեռնեք մեր Apricot հավելվածը App Store-ից և Google Play-ից։ Իմացեք ավելին ներդրումների մասին Էփրիքոթ Ակադեմիայում։ 

Կարևոր է հիշել, որ ցանկացած ներդրում ենթակա է շուկայական տատանումների և կրում է ներհատուկ ռիսկեր: Նախքան ներդրումներ կատարելը, հաշվի առեք Ձեր ֆինանսական նպատակները և ֆինանսական ռիսկեր ստանձնելու Ձեր ունակությունը:

Էփրիքոթ Կապիտալը վերահսկվում է ՀՀ Կենտրոնական բանկի կողմից։ 

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: Տեքստում նշված նախկինում գրանցված կատարողականը չի երաշխավորում ապագայում նմանատիպ արդյունքներ: