Հարց ու պատասխան Էփրիքոթի հետ | Ինչպե՞ս են մարդիկ գումար վաստակում ներդրումներով: Օրինակ 2 | Շահաբաժին և արժեկտրոն

Բլոգի նախորդ  գրառման մեջ քննարկել էինք, թե ինչպես են մարդիկ օգտագործում ներդրումները՝ իրենց փողի արժեքի պահպանման (կապիտալի պահպանում) և խնայողությունները գնաճից պաշտպանելու համար։ Այս անգամ կուսումնասիրենք, թե ինչպես կարող եք եկամուտ ստանալ Ձեր ներդրումներից։ Կա երկու տարածված եղանակ՝ շահաբաժին (դիվիդենդ) վճարող բաժնետոմսեր և արժեկտրոն (կուպոն) վճարող պարտատոմսեր։

Ի՞նչ են շահաբաժինները (դիվիդենդներ) և արժեկտրոնները (կուպոններ) 

Դրանք Ձեր կապիտալի (գումարի) ներդրման դիմաց ստացվող եկամուտն են։

• Շահաբաժիններ (դիվիդենդներ) | Երբ Դուք գնում եք ընկերության բաժնետոմսեր, Դուք ըստ էության դառնում եք այդ բիզնեսի մի փոքր մասի սեփականատեր։ Եթե ընկերության գործերը լավ են և այն շահույթ է ստանում, այն կարող է որոշել այդ շահույթի մի մասով կիսվել իր բաժնետերերի հետ՝ շահաբաժիններ վճարելով։ Ոչ բոլոր բաժնետոմսերն են վճարում շահաբաժիններ Ընկերությունները կարող են որոշել իրենց շահույթը վերաներդնել բիզնեսում՝ այն էլ ավելի զարգացնելու համար։ Շահաբաժինների վճարումները սովորաբար կատարվում են եռամսյակը մեկ, բայց որոշ ընկերություններ դրանք վճարում են ամսական կամ կիսամյակը մեկ։
• Արժեկտրոններ (կուպոններ) | Երբ դուք գնում եք պարտատոմս, դուք ըստ էության «պարտոքով գումար եք տլաիս» ընկերությանը կամ կառավարությանը։ Փոխարենը նրանք պարտավորվում են Ձեզ վերադարձնել այդ գումարը ապագա ամսաթվով և վճարել կանոնավոր տոկոսային վճարումներ, որոնք կոչվում են արժեկտրոն (կուպոն)։ Պարտատոմսերի մեծ մասը վճարում է արժեկտրոն, չնայած կան որոշ բացառություններ, ինչպիսիք են զրոյական արժեկտրոնով պարտատոմսերը։ Կտրոնների վճարումները սովորաբար կատարվում են կիսամյակը մեկ։

Գիտե՞ք, որ բորսայում շրջանառվող ֆոնդերը (ETF-ները) նույնպես կարող են դիվիդենդներ վճարել։

ETF-ները արժեթղթերի զամբյուղներ են (կարող է օրինակ բաղկացած լինել բաժնետոմսերից կամ պարտատոմսերից), որոնք կարող եք գնել և վաճառել ինչպես բաժնետոմսերը։ Եթե ETF-ի հիմքում ընկած ակտիվները վճարում են շահաբաժիններ, ապա այդ շահաբաժինները սովորաբար փոխանցվում են ETF բաժնետերերին։ Իմացեք ավելին ETF-ների մասին՝ կարդալով մեր բլոգի համապատասխան գրառումը։

Հիմնական տարբերությունը

Արժեկտրոնները համարվում են ֆիքսված եկամտի հոսք, քանի որ դրանց վճարումները կանոնավոր են և գրաֆիկով։ Շահաբաժինների վճարումները երաշխավորված չեն։ Ընկերությունները կարող են ավելացնել, նվազեցնել կամ նույնիսկ չվճարել շահաբաժիններ՝ կախված իրենց ֆինանսական կատարողականից։

Վերաներդրում՝ երկարաժամկետ աճի համար

Շահաբաժինների ու արժեկտրոնների վերաներդրումը կարող է հզոր գործիք լինել երկարաժամկետ աճի համար։ Երբ օգտագործում եք շահաբաժինները կամ արժեկտրոններն ավելի շատ ներդրումներ կատարելու համար, Դուք կարող եք օգտվել բարդ տոկոսից՝ ըստ էության տոկոս ստանալով Ձեր տոկոսագումարների վրա։ Սա թույլ է տալիս մեծացնել Ձեր եկամուտը և ժամանակի հետ կուտակել հարստություն։ Իմացեք ավելին բարդ տոկոսի մասին՝ կարդալով մեր բլոգի համապատասխան գրառումը։

Դիվերսիֆիկացման կարևորությունը

Ներդրումներ կատարելով և՛ շահաբաժին վճարող բաժնետոմսերում, և՛ պարտատոմսերում, Դուք կարող եք ունենալ դիվերսիֆիկացված պորտֆել՝ նվազեցնելով ռիսկը։ Եթե ներդրումների մեկ տեսակը վատ կատարողական ունենա, մյուսը կարող է օգնել փոխհատուցել հնարավոր կորուստները։ Այս հավասարակշռված մոտեցումը կարող է օգնել ապահովել ավելի կայուն եկամտի հոսք։

Հետաքրքրվա՞ծ եք ներդրումներից եկամուտ ստանալով

Իմացեք ավելին ներդրումների մասին Էփրիքոթ Ակադեմիայում։ 

Բացեք անվճար բրոքերային հաշիվ և ներբեռնեք մեր Apricot հավելվածը App Store-ից և Google Play-ից։

Կարևոր է հիշել, որ ցանկացած ներդրում ենթակա է շուկայական տատանումների և կրում է ներհատուկ ռիսկեր: Նախքան ներդրումներ կատարելը, հաշվի առեք Ձեր ֆինանսական նպատակները և ֆինանսական ռիսկեր ստանձնելու Ձեր ունակությունը:

Էփրիքոթ Կապիտալը վերահսկվում է ՀՀ Կենտրոնական բանկի կողմից։

*Նյութում ներկայացված օրինակները կրում են միայն տեղեկատվական բնույթ: Դրանք չեն հանդիսանում ներդրումային խորհուրդ կամ որևէ կոնկրետ արժեթուղթ գնելու կամ վաճառելու առաջարկ: Տեքստում նշված նախկինում գրանցված կատարողականը չի երաշխավորում ապագայում նմանատիպ արդյունքներ: