Apricot Capital-ն աջակցում է Կարլ Ֆլեշի «Ջութակ նվագելու արվեստը» ուսումնական ձեռնարկի հայերեն թարգմանությանը

Իր կորպորատիվ սոցիալական պատասխանատվության շրջանակում Apricot Capital-ն աջակցում է աշխարհահռչակ ջութակահար և մանկավարժ Կարլ Ֆլեշի «Ջութակ նվագելու արվեստը» աշխատության հայերեն թարգմանությանը։ Նախաձեռնությունն իրականացվում է Primavera հիմնադրամի կողմից՝ գերմանական Ries & Erler հրատարակչության հետ համագործակցությամբ։ Ծրագիրը ֆինանսավորվում է Ամարյան բարեգործական հիմնադրամի, Apricot Capital-ի և Balchug Capital–ի կողմից։

Այս աշխատությունը համարվում է ջութակի ուսուցման դասական մեթոդներից մեկը, որն օգտագործվում է երաժշտական կրթական հաստատություններում ամբողջ աշխարհում։ Հայերեն թարգմանության շնորհիվ այն հասանելի կդառնա Հայաստանի ջութակահարների և երաժշտության ուսուցիչների համար՝ հնարավորություն տալով լիարժեք ընդգրկել այս միջազգային մեթոդը ուսումնական գործընթացում։

Ձեռնարկը ներառում է ջութակի ուսուցման հիմնական բաղադրիչները՝ կեցվածք, ձայնարտադրություն, աղեղի և մատների տեխնիկա, վիբրատո, երաժշտական հիշողություն, ինչպես նաև կատարողական խորհուրդներ, սխեմաներ և օրինակներ հայտնի կոմպոզիտորների գործերից։ Մինչ այժմ հայ երաժիշտների համար հասանելի է եղել միայն խորհրդային շրջանի ռուսերեն թարգմանությունը, իսկ հայերեն տարբերակը կդառնա աշխատության լիարժեք և արդի ներկայացումը։

Թարգմանված տարբերակի առաջին տպաքանակը կլինի 500 օրինակ։

Ծրագրի հետագա մանրամասները կհրապարակվեն Primavera հիմնադրամի պաշտոնական կայքում և սոցիալական ցանցերում։

Apricot Capital-ը կարևորում է կրթության հասանելիությունը և շարունակում է աջակցել ուսումնական բարձրորակ նյութերի ստեղծմանն ու տարածմանը։ Նմանօրինակ նախաձեռնություններից է նաև 2025 թվականի մայիսին Newmag հրատարակչության հետ համագործակցությամբ Մորգան Հաուզելի «Փողի հոգեբանությունը» համաշխարհային բեսթսելլերի հայերեն թարգմանությունը։